بالتفصيل والصور: كيف تقوي نور الفوانيس الامامية وتركب كتاوت خطوة خطوة (جميع السيارات)

بسم الله الرحمن الرحيم

ان شاء الله سو ف نقوم بشرح بالتفصيل كيف تقوم بتحسين النور في السيارة ووضعها على كتاوت .. انا شوفت القصة لقيتها تفهه جدا مش محتاجة لاي مهارة لو بتعرف تمسك مفك و مفتاح وتربط مسمار حتعرف تعملها المهم خلينا نبدأ بسم الله :....

الفكرة : تغيير المبات الى لمبات اقوى وتركيب كتاوت للنور

مقدمة : مبداء العمل هو انك بتدي كهرباء للكتاوت من الموجب وتوصل بيها اللمبات وخلي السلك القديم اللي جاي من الضفيرة ورايح للمبة يدخل على الكتااوت عشان يفتح ويقفل الدائرة اللي بتوصل الكهرباء من البطارية طواللي للكتاوت ومنها طواللي على اللمبة دلوقتي انت كده عملت حجتين

1- قويت النور : لان لو فيه سلك في الضفيرة ملمس او بايظ انت كده ادي اللمبة دايركت من الكهرباء العمومي وحتى لو مافيش سلك بايظ طول السلك الاصلي بيعمل شيء من المقاومة اللي بتضعف النور حبة عشان كده تلاقي العربيات القديمة هي اللي بتحس بالفرق لما تركب الكتاوت بس لان الضفيرة بتبقى مستوية والسلك بقى قديم وزادت مقاومته اما العربيات الجديدة فيبقى فرق القوة ضعيف او غير ملحوظ لو كانت ضفيرة العربية كويسة

2- ان بتبعد جهد الكهرباء العالي الناتج تشغيل لمبات ذات الواط العالي عن ضفيرة العرية ومفتاح النور وبذلك تحمي الضفيرة انها تتحمص والمفتاح  او دراع النور انه يسيح وده اللي بيحصل لما تيجي تركب لمبات عالية من غير كتاوت

المرحلة الأولى : (( شراء الادوات))

1- عدد 2 لمبه للفوانيس الامامية عندك نوعين كويسين التانجوسرام 140/100 وات و الفليبس رالي وانا شخصيا مجرب و افضل التانجوسرام ادائها اعلى بس لو لقيتها سعراللمبة الواحدة 40-45 جنيه جديدة و الفليبس ب 50 على ما اعتقد فيه انواع ب 20 جنيه و بيقولك الماني بس انسى في البطيخ وياريت تشتري من توكيل افضل شئ




2- عدد واحد كتاوت تركي اسمه ELO ده ب 35 جنيه فيه نوف فرنساوي تاني ب 35 بس انا حسيت ان تقفيل التركي انظف ومواد التصنيع افضل

3- عدد 3 متر سلك 5 مللي معتمد لونه ازرق و 3 متر سلك 5 مللي معتمد لونه احمر (أي لونين مختلفين مش شرط الالوان دي)

ملحوظه لو السلك مش معتمد مش هيبقبي ليه اي لازمه و كل الي هتعمله هيبقي علي الفاضي

4- عدد 2 ترامل واحدة 8 مللي وواحدة 10 مللي

5- عدد 6 كلبسات و 6 غطيان كلبسات

6- لمبة ودويل 12 فولت  ممكن اللمبه القديمه الي في الكشاف وأي سلك مجوز طوله 3 متر ووصلهم ببعض وجرب اللمبة انك توصلها بالبطارية حنستخدمهم كلمبة اختبار تيست.

7- قلم فولوماستر

المرحلة الثانية (( أستكشاف ضفيرة السيارة ))

دي اسهل مرحلة في البداية فك الكبل اللي داخل على اللمبة اللي في الفانوس الامامي حتلاقي ليها 3 أطراف واحد زي كده

الاطراف الثلاثة هي الي في النص  ارضي وواحد كهرباء موجب للنور الواطي وواحد كهرباء موجب للنور العالي دلوقتي وصل سلك اللمبة التيست اللي جبناها في المرحلة الأولى في الفقرة رقم 6 بأرضي السيارة وبعدين نور النور الواطي واقعد جرب بالطرف التاني للمبة التيست عشان تعرف اي واحد من الاتنين التانين غير طبعا الي في النص   الي في  كهرباء الموجب بتاع النور الواطي وعلم عليه بالفلوماستر مثلا اكتب حرف L ونفس الطريقة نور العالي وجرب لحد ماتجيب كهرباء موجب بتاعت النور العالي وعلم عليه .. نفس الطريقة في الفانوس بتاع الجنب التاني . دلوقتي بعد انتهاء الخطوة دي عندنا 4 اسلاك متعلمين( جنب يمين عالي جنب يمين واطي جنب شمال عالي جنب شمال واطي)

المرحلة الثالثة : (( تجهيز سلك الفوانيس لتكريب الكتاوت ))

لازم قبل ماتشتغل في المرحلة دي تختار حتحط الكتاوت فين ... انا فضلت احطها شمال لعدة اسباب :

- قريبة من البطارية وده معناه سلك اقل وده معناه مقاومة اقل للسلك و احتمالات تلف السلك اقل

- مكان ضيق فالمياه اصعب انها توصل للكتاوت

ولاحظ ان المكان اللي حتتركب فيه الكتاوت يكون من جسم العربية المعدني مش حته فايبر او بلاستيك عشان الطرف الارضي بيتاخد من مكان مابتركب مالهاش سلك منفصل

دلوقتي انا حشرح بافتراض انك حتعمل زيي وتركب الكتاوت شمال جنب البطارية وسنقسم هذه المرحلة الى جزئين كل جنب مختلف في شغله عن الجنب الاخر

- الجانب الأيمن (الفانوس اليمين) : بدأت بيه عشان شغله سهل جدا كل اللي حتعمله انك حتقطع السلك الموجب بتاع النور العالي وتوصل الجزء من السلك اللي متوصل بالفيشة اللي داخل للمبه بتاعت الفاونس بالسلك بال 5 مللي اللي احنا جبناه بالازرق مثلا وتربطه كويس بالشيكرتون اما الجزء التاني اللي جي من الضفيرة ده لفه بالشيكرتون والغيه نفس الكلام اعمله مع السلك بتاع الموجب بتاع النور الواطي ((مثلا باالسلك الاحمر ال 5 مللي) وطبعا غير اللمبة عشان تبقى خلصت من الجنب ده مرة واحدة . بعد كده ضفر السلك عشان مايزاولكش وعديه من اي حتة مدارية للناحية التانية (الشمال) .. انا عديته من ورى الشبكة بعيد عن الراداتير تقريبا في قلب الاكصدام.. لاحظ اننا ماقطعناش السلك الارضي اللي رايح للمبة يبقى لو بصيت تلاقي اللمبة اليمين متوصله بالارضي وبسلك ازرق 5 ملللي وسلك احمر 5 مللي معاك طرفه كده خلصنا الجنب اليمين .بعد ماتعدي السلك قربه للمكان اللي المفروض تحط فيالكتاوت وركب الكلبسات والغطى بتاع الكلبسات اللي جبناه في الخطوة 5 من اول مرحلة .. كده يبقى الجنب اليمين جاهز للتركيب

- الجانب الأيسر : نفس اللي عملته في الجنب الايمن (( مع الحفاظ على الالوان الازرق للنور العالي والاحمر للنور الواطي)) الاختلاف انك مش حتلغي السلك اللي جاي من الضفيرة لأ انت حتعلم مين بتاع العالي ومين بتاع الواطي بالقلم الفولوماستر وبعدين ركب فيهم كلبسات بغطيانها وده حيبقى المسؤول عن تشغيل النور بعد توصيلها بالكتاوت

بعد انتهاء هذه المرحلة حيبقى عندنا عدد 6 اسلاك متركب فيهم كلبسات جاهزين للتركيب هما كالاتي :

- سلك ازرق بتاع النور العالي للجنب اليمين (مكان رقم 2)

- سلك ازرق بتاع النور العالي للجنب الشمال(رقم 2)

- سلك احمر بتاع النور الواطي للجنب اليمين(رقم 3)

- سلك احمر بتاع النور الواطي للجنب الشمال (رقم 3)

- سلك اللي جاي من الضفيرة الشمال اللي قطعناه وركبنا فيه كلبس وكان مسؤول عن امداد الفانوس الشمال بموجب النور العالي (رقم 4)

- سلك اللي جاي من الضفيرة الشمال اللي قطعناه وركبنا فيه كلبس وكان مسؤول عن امداد الفانوس الشمال بموجب النور الواطي (رقم5)

انا كتبت ارقام عشان على حسب الارقام المكتوبة على الكتاوت للتوضيح

الخطوة الاخيرة ((التوصيل ))

اكيد فاضل عندك حتة سلك من اللي قصيته توصل بيه بين البطارية والكتاوت . قيس المسافة واقطع حتة سلك قدها وركب في طرف الترملة ال8 ملل و الطرف الثاني الترملة 10 مللي وركب الترملة ال8 مللي اللي متوصل فيها السلك بالكتاوت مش حتلاقي اللا مكان واحد ينفع تركب فيه الترملة وهو اللي فيه الصامولة وفي الصورة رقمه 1

وصل الترملة ال 10 مللي بالبطارية بالموجب

- وصل الاسلاك على حسب الارقام كالتالي :

- سلك ازرق بتاع النور العالي للجنب اليمين (مكان رقم 2)

- سلك ازرق بتاع النور العالي للجنب الشمال(رقم 2)

- سلك اللي جاي من الضفيرة الشمال اللي قطعناه وركبنا فيه كلبس وكان مسؤول عن امداد الفانوس الشمال بموجب النور العالي (رقم 4)

- سلك احمر بتاع النور الواطي للجنب اليمين(رقم 3)

- سلك احمر بتاع النور الواطي للجنب الشمال (رقم 3)

- سلك اللي جاي من الضفيرة الشمال اللي قطعناه وركبنا فيه كلبس وكان مسؤول عن امداد الفانوس الشمال بموجب النور الواطي (رقم5)

جرب كده مش شغال صح عشان اكيد انت عكيت الدنيا وموصل غلط بهزر معاك متقلقش 
 المشكلة انك لسه ماركبتش الكتاوت في العربية لازم تركبها في حته كويسه عشان الكتاوت بتاخد الارضي من المسمار اللي مربوطه فيه  عشان كده ماينفعش تركبها في حته فيبر او في
 بلاستك

شرح كيفه العمل و فكره التشغيل

 لما حتنور النور الواطي السلك اللي جاي من الضفيرة حيوصل كهرباء لرقم 5 حتروح فاتحة الكتاوت وموصله الكهرباء لرقم 3 وطبعا الكهرباء حتاخدها من مكان رقم 1 اللي متوصل بالبطاربة مش من الضفيرة ونفس الكلام رقم 2 ورقم 4 شغالين مع بعض ...

مبروك يامعلم عملتها بنفسك من غير كهربائي

اخيرا الموضوع تم نقله من احد المنتديات المشهوره و تم اعاده الصياغه و تعديل بعض الصور 

 شكرا و تقدير

اخيرا اتمني من الله ان اكون وفقت في الشرح و هذا الموضوع هو عمل شخصي و اكيد به اخطاء فارجوا من الجميع المعذره في اي اخطا و لو اصبت فهوا من الله و ان اخطاء فمني و من الشيطان

الموضوع مفتوح للنقاش لاضافه اي شي او تعديل الموضوع

تحياتي للجميع و لكم مني كل حب و تقدير

اخوكم / وليد ابو يوسف و عمر و نور