بسم الله الرحمن الرحيم
الاخوه الكرام تحيه طيبه انهارد شرح طريقه تعديل الشنطه الي كهرباء و ده طبعا هيرحمنا من السرقه و فتح الشنطه باي مفتاح و كمان حميت نفسك من السرقه و زوده رفاهيا ليك علشان هتفتح الشنطه بالكهرباء او الرموت بدون مفتاح خالص زي العربيات الحديثه و مفيش حد احسن منااااااا وعلي بركه الله نبداءالخامات الي هنشتريها
1/ قربه سنتر 2 طرف من عند اي بتاع اكسيسوار او من التوفقيه الصيني بي 30 جنيه و التيواني 40 جنيه
2/ مفتاح رقم 10 بلدي لفك الكالون
3/ مفتاح كهرباء ضغط من عند اي بتاع اكسيسوار بي 10 جنيه
4/ حوالي 6 متر سلك توصيل 1 مللي طرف واحد المتر بحوالي 2 جنيه
5/ افيز بلاستك من عند بتاع الاكسيسوار بي 1 جنيه
6 / فيوز من عند بتاع الاكسيسوار و يفضل اقل امبير مثلا واحد امبير
7 / ترامل نحاس من عند بتاع الاكسيسوار و يفضل بالجراب و ده هنستخدمها علشان نركب الفيوز هتجيب 2 ترمله
ثانيا خطوات التنفيذ وهي قسمين ميكانيكا و كهرباء
1 / نبتدا الاول ميكانيكيا و هي للناس الي الشنطه بتفتح باي مفتاح فهنحتاج نفك الكالون بي مفتاح 10 و هنلاقي تحت الليسان الي هنفكه تيله صغيره الي بتزق الكالون علشان تفتح هنقوم باي مفك زق التيله من طرفها علشان نخلع اللسان او نقوم بالدق خفيف علي اللسان الي تحت الكالون علشان محدش يفتح بالمفتاح تاني مثل الصوره
بعد الغاء اللسان الي تحت الكالون نقوم بي اعاده تركيبه مره تانيه بنفس المسمارين و نتاكد ان المفتاح من بره مش هيفتح الكالون تاني
ملحوظه هامه اوعي تقفل الشنطه دلوقتي خالص لانك مش هتعرف تفتحها غير لو شلت الكانبه الخلفيه بتاعه الصالون و مديت ايدك و شديت اللسان
نقوم بتركيب القربه بجوار الكالون مثل الصوره و نقوم بفرد الشداد بتاع القربه لنهايه المشوار مع العلم ان القربه ده بتعمل حاجتين الاول بتسحب لجوه لو مفروده و التانيه بتزق لقدام لو مقفوله و الي بيحدد هيا هتسحب ولا هتزق هو اتجاه دخول الكهرباء ليها بمعني هي ليها طرفين واحد مثلا ازرق و التاني احمر لو خلينا الاحمر كهرباء و الارضي ازرق هتقوم تضغط و لو غيرنا خلينا الازرق كهرباء و الاحمر ارض من جسم العربيه هتقوم سحبه و هو ده الي احنا عوزينه انها تخليها تسحب
بعد تثبيت القربه في جسم الشنطه نقوم بتركيب الافيز بالبلاستك من القربه الي اللسان زي الصوره ولازم نكون فتحين القربه زي الصوره وبكده نكون خلاصنا اول جزء و هو الميكانيكي و ندخل الجزء التاني بس صحصح معايا جامد
الجزء التاني هو توصيل الكهرباء و ده لازم تبقي صاحي و فايق و رايق لانه خطر شويه ولازم تكون حريص
هنقوم اولا باختيار مكان مناسب في الطابلوه لتركيب المفتاح فيه و يكون في متناول ايدينا و بعد اخيار المكان هنقوم بفك حرف الارضيه من ناحيه عتبه الباب قدام و وراء و في كل باب ممسوكه بمسمارين او اكتر و ده علشان نمشي السلك تحت الفرش بتاع الارضيه
لازم يكون السلك ماشي مستريح جدا تحت الفرش و ميكونش مزنوق في اي مكان علشان ميتقطعش او يعمل قفله فيما بعد
بعد فك الفرش بتاع الارضيه هنحتاج نرفع الكنبه الخلفيه او نحركه بسيط علشان نعدي السلك من قدام الي الشنطه و لازم برضه تعديه من مكان مجوف و ميكونش مضغوط علي السلك نهائئ
و بكده هيكون احنا عدينا اول طرف السلك من التابلوه الي الارضيه في اول باب بتاع السواق و بعدها الي الباب الي خلف السواق و بعدها من تحت الكنبه الخلفيه و بعدها الي الشنطه و كل ده مع مراعه ان السلك ميكونش مزنوق في اي مكان نهائي
هنا هنبتدي التوصيل علي بركه الله و هيا هنبدا بالتجربه الاول علشان نحدد الاطراف مين هيبقي الارضي و مين هيبقي الكهرباء و ده عن طريق توصيل الفرده الي في التابلوه من البطاريه مباشر و بعدها نوصل مثلا علي الطرف الاحمر و الطرف التاني بتاع القربه علي جسم العربيه لو سحب اللسان يبقي تمام لو مسحبش يبقي نبدل الاطراف مثل مقلنا فوق و هنا نبقي حددنا الاطراف
هنقوم بتوصيل الطرف الارضي بجسم العربيه مثل الصوره و الطرف التاني في طرف القربه
هنا هنكون خلصنا توصيل القربه و نرجع لقدام و الشغل المهم هنقوم بتركيب المفتاح في مكان التابلوه و المفتاح ليه مكانين هنقوم في اول مكان بتركيب الطرف الي جاي من القربه و المكان التانيه هنقطع مثلا 30 سم سلك و نربطه في طرف المفتاح التاني و طرف السلك التاني اقصد القطعه ال 30 سم هنركب فيها اول ترمله نحاس و نغطيه بالجراب كويس و نجيب مثلا قطعه سلك تاني طولها متر او متر ونص و ده هتبقي التغذيا العمومي للكهرباء و ده اول طرف ليها هنركب فيها الترمله النحاس التانيه و نعزلها برده بالجراب كويس جداااا و كده بقي عندنا 2 كلبسه معزوله واحده من السلك الي خارج من المفتاح و واحده من السلك الي متر ونص و هنقوم مركبين الفيوز الي اشترناه فوق في الترملتين و ده هيحفظنا باذا الله ان لو حصل اي قفله او اي شي الفيوز يضرب و مياثرش علي شي باذا الله
و بعد تركيب الفيوز نسم الله و نقوم ربطين الفرده الي ناقصه بتاعه المتر و نص في فرده الكهرباء بتاعه البطاريه و ده هتلقيها مميزنها ببلاستك حمرا علي البطاريه
و هنا بفضل الله هنكون انتهينا من التعديل و كله تمام و ابسط يا حج شنطتك بقت بالكهرباء
ملاحظات التركيب
1 /لازم الشنطه يبقي راكب ليها سوسته علشان لو منغير سوسته او لو مبترفعش لوحدها كل لما هتدوس علي المفتاح الشنطه مش هتفتح لان الباب بتاع الشنطه تقيل عليها
2 / لو قلقان من موضوع التوصيل و اللعب احنا هنا وصلنا من خارج الدفيره خالص و لو صعب مد السلك و روح لاي كهرباء يوصلك المفتاح من علبه الفيوزات
هنا انتهينا باذا الله و الشرح ده حصري لجروب مازدا ايجيبت 323
تحياتي ليكم جميعا و جاهز لاي استفسار باذا الله
اخوكم / وليد
