بسم الله الرحمن الرحيم
اليوم هنقل ليكم تجربه جديده و فريده و بسعر رخيص و هي تركيب تكيف كامل للمازدا 323 و هنقول كل التفاصيل و الاسعار و الماكن الي ركبت فيه هو ورشه النصر المهندس سمير مدني في الشربيه و هضيف الكارت بتاعه اسفل الموضوع و بسم الله نبداء ....
بدايه الحكايه
من فضل الله اشتريت مازدا 323 معدلها اتوماتيك من فتره و كانت مجهزه تكيف و عباره عن كباس و ثلاجه داخل الصالون و مراوح التبريد و خراطيم قديمه و فلتر زيت قديم و من هنا بداء الحلم يدور في دماغي ان اكمل باقي التكيف و اعيش بقي زي باقي الناس المتكيفه :) و قررت اني اعمله قبل الصيف علشان السعر ميبقاش غالي و يبقي فرصه اني ادور علي حد رخيص اكبر و فعلا روحت لاكتر من مكان
لاول ورشه في ميدان الاميريه و قلتله عاوز اركب باقي اجزاء التكيف و اصلحه اوك افتح الكبوت لف الكباس بايدك اده مليان طينه و الخراطيم ده عاوزه تغير و وووووووووو المهم كام ياحج بص علشان يعني نظبط و اقل تكلفه 2850 و الله اعلم هيبقي عامل ازاي كويس او لا ده بتاع ربنا او بقي نركب واحد جديد من بابه بي 5800 و كده يبقي افضل خلاص تمام شكرا
التاني ورشه في شارع السواح بجوار محطه الكابلات سلام عليكم عاوز اشغل التكيف ده لا يا فندم مبنشتغلش في القديم بنغيره لجديد بس طيب بكام 6200 الماني بالضمان بس بشرط تروح الاول تعزل كويس الصالون طيب و القديم لا ده يترمي و تنساه و الكباس شغال لا ده مليان طينه و باظ
التالت ورشه في الحي السابع مدينه نصر السلام عليك من فضلك عاوز اركب باقي التكيف و اشغله لا يافندم هنا عربيات حديث بس و مبنشتغلش قديم و بعدين ده عربيه تكيفها كبر دماغك اقولك انزل الحرفين هتلاقي هناك احسن و ارخص و هيعمللك الي انتا عاوزه
و من هنا قررت انزل الحرفين الي بسمع عنها اساطير و كلام كتيرررررر شغلت الجي بي اس في الموبايل لان مبعرفش في الطرق و اتوجه بامر الله و كانت المفاجاه
اول محل لا مش عندي روح لتاني محل و التاني روح لعم فلان و عم فلان روح محل ايه و من هنا لي هناااااااا و كلام كتير و هرتله و مبنشتغلش في القديم و غير جديد و يوم طويل عريض و اسعار فوق الخيال و طبعا مش عاجبهم العربيه عرفين ان الزبون علي قده عوزين عربيات حديثه علشان نعرف نسلخ الزبون و نعوره تمام
مشيت و انا محبط جداااااا من الموضوع و قولت خلاص عليه العوض في التكيف و قررت عهد علي نفسي منزلش الحرفين ده تاني
يومين ثلاث كده و قدرا الدينمو عندي باظ روحت للكهرباء بتاعي قلي الدينمو ده تعبان اوووي غيره احسن منين قال روح للمهندس سمير مدني في الشرابيه هيريحك و روحت فعلا للمهندس سمير و لقيت عنده بالصدفه بيركب تكيف لعربيه عنده عنيه نورت تاني و الحلم رجع من جديد بقولك يا هندسه عاوز اركب التكيف عندي ... عيوني بس كده اده الموضوع سهل كده اه طبعا عادي طيب بص كده محتاجين ايه عمل معاينه و بص علي الكباس و قالي روح الاول اغسل حوض العربيه من الزيت و اغسل الكباس بالجاز كويس و نجرب الي عندك و هنحتاج سربنتين و مروحه زياده و حبه حجات صغيره هنكتشفها و احنا برنكب و هيشتغل يا هندسه اه هيشتغل ان شاء الله بس اعمل حسابك انه ممكن يصرف بس على العموم الفيصل ان الكباس يبقي تمام لان ده لوحده حوالى 700 جنيه و لفه بايده كده و قالي انا شايف سليم و شغال عاوز بس يتغسل و الحاجه التانيه جديده حوالي 1000 جنيه لو تمام و السعر مناسب هنغسل الكباس و نجرب و نتوكل علي لله جابلي امل تاني في التكيف و قلت ان شاء الله هنفذا
يوم التجارب و التجهيز
روحت المغسله و غسلت الحوض كويس بالجاز و نظفت الكباس من الطينه الي عليه و توجهت للمهندس سمير بص علي الكباس و قالي عوزين سير قمت اشتريت واحد رقمه 755 كوري بي 50 جنيه و قلت ابتدنا المصاريف يارب قوينا و ركبنا السير و يلا نجرب جاب سلك خارجه و دور الكباس يا حج و انا بكل فضول واقف قدام الكباس علشان اشوفه و هو بيدور و هااااااب الطينه كلها في وشي الحمد لله مش مشهم وشي المهم انه الكباس شغال ): و قام قايل الحمد لله كده الكباس شغال عوزين نشتري باقي القطع علشان ننفذا طيب هات عربون من الفلوس علشان التاكيد و بكرا الصبح باذا الله تجيب العربيه الساعه 9 الصبح و اعمل حسابك التركيب حوالي يوم ونص قولت ده اكيد بيكبر الموضوع و اديته 300 جنيه عربون و مشيت و هرجع بكرا صباحا
يوم التركيب
خت اليوم اجازه من الشغل و نيمت براحتي و قمت الساعه 1 الظهر و اتوجهت للمهندس سمير وصلت الساعه 2 و اول لما شافني قالي مش قولت ليك تعالي الساعه 9 قلتله لسه صاحي قالي كده هنشتغل يومين علشان تنبسط ): فك يا ابني بسرعه علشان نشتغل
و يلا نتوكل علي الله و نركب السربنتين الجديده
و بعد تثبيت السربنتين الجديده قدام الرادياتير و تركيب المروحه الجديده
و يلا بينا نشوف الخراطيم علشان نوصلها و نبتدي الشغل الجاد
الحمد لله الخراطيم طلعت بايظ و الفلتر الاسود بتاع الزيت بايظ و علي بركه الله و الحل يا حج سمير هنغير الخراطيم قلتله لا لا لا قالي في ايه قلت غير الطقم كله احسن علشان ميبقاش في وجع دماغ بعد كده
جاب خراطيم و يلا ناخد مقاسات و قلت ده حوار هتنفخ اروح اعمل خراطيم و هبا لقيته داخل عليا بالتقيل طلع المكبس و يلا بينا نكبس الخراطيم الصراحه انا اطبسط و قلت اهم من الشغل ضبط الشغل
بعد كبس الخرطيم بالسلامه قمنا نركب الفلتر بتاع الزيت و نوصل الخرطيم
و بعدها قام تركيب راليه الربليشه و ده مسؤال عن تشغيل الكباس و المراوح و يحس بالتبريد
و بعد تركيب الخراطيم بفضل الله دخلنا في كبس الهواء علشان نشوف لو في اي تنفيس او شي
و احنا بنكبس هواء للاسف الخراطيم كلها تمام ولكن القاعده بتاعه الكباس الي هيا البلاته الي بيركب فيها الخراطيم بتنفس و بكل المحاولات للاسف لازم البلاته تتغير ...... مممممممم خلاص الحمد لله غير يا حج
و غير البلاته و تم بفضل الله كبس الهواء و مبقاش في تنفيس نهائي و يلا بينا نشحن علشان نجرب
و قمنا بالشحن و ده اول مره اشوف الهواء ساقع جوه العربيه بس للاسف الهواء مش ساقع جامد و درجه التبريد قليله قالي كده التلاجه عاوزه تتنضف و تتغسل بس ده بكرا بقي و عليك خير الساعه دلوقتي 11 بليل و كل منك جايلي الساعه 3 روح نام بقي و تعالي الساعه 9 الصبح قلتله لا شكرا خلي لعربيه عندك و افتح وقت متحب و اشتغل و روحت بالسلامه و هما قفله و خلص اليوم الاول
تاني يوم الصبح فك التلاجه علشان التنظيف و لقنها بالف هنا كانت بتاكل ورق شجر
و قام بالتنظيف كويس و غسل الثلاجه و يلا بينا نجرب التبريد زاد بس برده مش هو الي عوزينه هات يبني حساس الحراره جاب المقاس و قاس طلع التبريد حوالي سالب 4 او سالب 5
و بعدين يا حج سمير ايه رايك انا شايف كده حلو لا كده مش تمام طيب و العمل قالي الكباس لسه في طينه و رواسب هنفضي الشحن تاني و نشحن من جديد ياعم حرام قالي الشغل شغلو المفاجاه بقي
اده كل ده وساخه و طين في الواسيرا ايوه الكباس لسه بينظف و يلا نشحن تاني و نجرب و نشوف الدنيا بقت احسن
هوب الدنيا اتظبط شويه و التبريد زاد سنه ها خلاص يا هندسه انا شايف كده كويس قالي لا هنفضي الشحن تاني و نشحن من جديد لغايه ميظبط معانا و فضي و اشحن و فضي و اشحن الله اعلم كام مره و انا اقول هتفع نص مليون جنيه شحن بس بعد كل ده و اخيرا و بعد تجارب كتبر ررررررا
التبريد نزل عن سالب 10 و انا مش مصدق ان الراجل مصمم يعمل حاجه صح مش تقضيه و خلاص و ياخد فلوس و السلام و هنا بقي قلتله معندكش حساس نقيس بيه اكتر من سالب 10 مممممممم
و قالي خد العربيه اتحرك بيها علشان نحرق علي الكباس و نجرب الوضع و نشوف التبريد اخباره ايه و فعلا اتحركت بالعربيه و قفلت الزجاج لاول مره عربيتي فيها تكيف يا ناس لفيت لفتين كده و رجعتله و الحمد لله كله تمام التمام و التبريد ممتاز
ها خلاص تمام كده امشي قالي تمش ايه احنا لسه معانا 3 ساعات نعمل ضفيره الكهرباء الجديده بتاع التكيف و نربط المراوح ببعض و نعزل الاسلاك يلهووووووي 3 ساعات طيب انا داخل انام فى التكيف و لما تخلص ابقي صحوني
تركيب 3 كتاوت و توصيل ضفيره تربط بين المروحه الجديده و المروحه الاساسيه بتاعه الرادياتير و الحساس بتاع الكباس و الحساس بتاع الفريون علشان لما تشغل الزرار بتاع التكيف يشغل المروحه الجديده و الكباس و زياده معاهم مروحه الرادياتير علشان ميبقاش في اي سخونيه و عزل كل الاسلاك جوه مكرونه حراري او اسمه ريكم او هيتش رنج و الصراحه تقفيل محتروم
و بعد ساعات كتير صحيت من النوم بفضل الله و عندي تكيف في العربيه و كله تمام عقبال كل الناس
مميزات و عيوب
طبعا اول ميزا ان الواحد بقي عنده تكيف
التكيف مش مؤثر على سخنيه العربيه علشان المروحتين شغلين
سرعه تبريد كويسه و درجه التبريد تمام و الجو منعش
العيب الوحيد ان التكيف بيقلل في تجميع الفتيس الاتوماتيك في الاول علشان اكيد الكباس عامل حمل علي الماتور و العربيه بتاعتي اتوماتيك و عزمها اقل من المانول يعني الي عنده مانول اظن مش هيحس بالموضوع ده
رجعت للحج سمير قلتله قالي انتا مستعجل امشي شويه علي الكباس لو مخفش تعالي نبدله بي واحد جديد خفيف جدا مخصص للعربيات الصغيره 1000 سي سي بس حرام دلوقتي يمكن الكباس يخف مع الحركه ده بقاله عمر مشتغلش و خت بنصحته و جاري التجربه
الحساب و المفاجاه
ها يا حج سمير حسابنا ايه بعد الشغل العالي ده المهم يكون عجبك انا الصراحه مبسوط جداااااا و الشغل عجبني خلاص يا مسهل هات يبني ورقت الحساب
و الصراحه التكلفه صدمتني مقارنه بالاسعار الي سمعتها فوق و الي سمعته من الناس المحترمه الي رحتلها وممكن كمان التكلفه كانت تقل عن كده لو البلته بتاعه الكباس طلعت سليمه و الخراطيم و الفلتر بس الحمد لله انا مبسوط كده
ملحوظه مهمه / الاسعار ده علي حسب كل عربيه هتتغير و علي حسب القطع الي انتا عاوزها و السليم عندك و الي هتحتاجه جديده علشان في ناس ممكن تدفع اقل من المبلغ ده و في ناس تدفع اكتر علي حسب الحاجه الي عندها و ده كان الاتفاق بيني و بين المهندس سمير
و اخيرا و ليس اخرا ده كارت المهندس سمير صاحب القصه
انا اسف جدا علي الاطاله بس حبيت احكلكم القصه بالكامل علشان الناس متسلمش نفسها لاي صنيعي و خلاص و ينصب علينا او يشتغلنا و لازم نعرف و نتعلم كويس و كلنا نفيد بعض
شكرا و تقدير
اخيرا اتمني من الله ان اكون وفقت في الشرح و هذا الموضوع هو عمل شخصي و اكيد به اخطاء فارجوا من الجميع المعذره في اي اخطا و لو اصبت فهوا من الله و ان اخطاء فمني و من الشيطان تحياتي للجميع و لكم مني كل حب و تقديراخوكم / وليد ابو يوسف و عمر و نور
