بسم الله الرحمن الرحيم
ناس كتير بتسأل ازاي تغسل حوض وموتور العربيه
وناس بتروح تغسل وتقابل واحد برنس فنفسه يضربلك المسدس ويروقهالك تخلص تيجي تدور العربيه قطعت كهربا وتحتاس .... هنقولكم النهارده على افضل طريقه تغسل موتورك بيها من غير م يتبهدل
هتجيب كيسين تلاته كده معاك وتطلع على مغسله او بنزينه بتغسل بالجاز بالكومبريسور مش بالباشبوري لان ضغطه عالي وهيبهدلك الدنيا
هتغطي الاسبراتير والموبينه كويس جدا بالاكياس وتتاكد انهم متغطيين ومحكمين ومش هيطيروا من الضغط او الهو
ممكن تغطي الكلاكس لو حابب لانه بيقطع شويه لما يدخله ميه وبيشتغل لما تنشف
هتفصل كابل الكهربا بتاع البطاريه للامان مش اكتر ويبتدي يتعامل بقى بالجاز والكومبريسور والمسدس ويروق ع الموتور ينزل كل الزيت والشحم اللي عليه ويخلي باله من الاسبراتير والموبينه ميركزش ناحيتهم
بعد م يخلص هيجيب جركن ميه ويحط عليه بريل او اي صابون ويرجه كويس وبعدين يحطه ف المسدس بتاع الكومبريسور ويبتدي يغسل بيه زي م كان بيغسل بالجاز لان الجاز لو قعد ع الكاوتش وااخراطيم بينشفها ف هيغسل وينزل الجاز بعد م نزل كل الزيت والشحم وبرضه ميركزش ناحيه الاسبراتير والموبينه
يخلص كل ده بعدين يجيب الهوا بس ويبتدي ينشف الحوض كويس ويطير الميه اللي متجمعه فيه بعديت بفوطه يبتدي ينشف ويمسح الباقي
هيخلص وتشيل الاكياس ترميها وتوصل كابلاتك وتدور عربيتك ومبروك عليك النضافه
ملحوظه : هتمشيلك يومين تلاته كده تشم ف ريحه جاز وتعمل دماغ وهتلاقي دخان طالع من الكبوت ده نتيجه تبخر الجاز اللي باقي وهيقل مع الوقت متقلقش
الموضوع ده انا بعمله فعربيتي كل شهر او اتنين والحمد لله معنديش اي مشاكل منه
المهم اللي يعمله يكون فاهم وانت تركز معاه عشان ميستسهلش ويعك
الموضوع منقول من جروب 128 ادمن عوض الله
