بسم الله الرحمن الرحيم
الاخوه الكرام جمعه مباركه ان شاء الله انهارده شرحنا هيكون اعاده احياء الفانوس الامامي او الكشاف الامامي للنجمه مازدا 323 جيش موديل 82 و تعديله الي نظام السخانات زي العربيات الحديث و تغير اللمبات الي لمبات افضل اضاءه و تغير الزجاج الامامي للكشاف و صيانه الكشاف بالكامل ... بسم الله نبدا و نرجوا منكم الدعاء بصالح الاعمال
الخامات المطلوبه للتنفيذ
1/سخان اضاءه اي لون تحب من التوفقيه مقاس 60 سم اللون الابيض الجوز 60 جنيه و باقي الالون الجوز بي 70 جنيه
2/ وش فانوس امامي زجاج متوفر عند هبه بلاست بي 20 جنيه و الجوز بي 40 جنيه في التوفقيه
3/ وش اشاره جنب من عند هبه بلاست الشفاف الجوز بي 20 جنيه و اللونين اصفر و ابيض بي 30 جنيه الجوز
4/ امبوبه سيلكون شفاف من عند اي موان بتاع حدايد و بويات الحجم الكبير بي 20 جنيه
5 / بكره لزق سلوتيب عريض من اي مكتبه بسعر 5 جنيه
6/ بكره لزق المونيوم من عند بتاع قطع غيار البوتجازات او خامات التكيف سعرها حوالي 35 جنيه و ده افضل من الورق المونيوم العادي لان ده في لزق من الخلف و مقاوم للحراره و تقدر تتحكم فيه داخل الفانوس افضل
7/ لمبات جديده علشان الطقم يكمل انا جبت لمبات ترافا الماني من عند الوكيل في شارع شبرا اسمه بدر شاهين عنوانه في الصوره و سعر اللمبه بي 40 جنيه اصفر و لا انصح بالاضاء البيضه او الازرق الغامق لانها بتحتاج عاكس قوي و عن تجربه الاصفر اضاءه ابيض و ان شاء الله الدرس القادم هنشرح ازاي نعمل تقويه لسلك الكهرباء و تركيب كتاوت جديد علشان نظبط شده الاضاءه
خطواط التعديل باذا الله
اول هنحتاج نفك الكشافات و الشبكه الاماميه و هنبتدي بالشبكه و هيا مربوطه بمسمارين مشار اليهم في الصوره و بعد فك الشبكه هنشوف الكشافات مبروطه ازاى و نفكها و كل واحد هيلقي الكشاف مربوط بحاجه غير التاني لان الكهربائيه بيخترع في كل عربيه بمزجهم حد هيبقي مربط عنده بمسامير و حد تاني بي سلك رباط و حد تاني بي حزام بلاستك و هكذا
بعد فك الكشاف من العربيه هنقوم بفك الزجاجه الاماميه بسلاح قطر او حرف سكينه و بحرص شديد علشان ايدك متجرحش و هيبقي مثل الصوره
بعد الفك من العربيه هنقوم بفك اللمبه اولا و بعدها هنقوم بغسل الكشاف كويس من الاتربه بالمياه او بالبنزيم و نسيبه ينشف جيداا
بعد الغسيل هنقوم جيبين اي اي قطع بلاستك قديمه عندنا و نقطع منها و نلحم الكسور بالامير و يفضل امير مصر لقوه ثباته
بعد لزق البلاستك هنقوم بعمل تجليد الكشاف من الداخل باللزق الالمونيوم زي الصوره و هنسيبه و ننتقل لتركيب السخان
هنجيب السخان الي اشترناه و نلزق السخان زي الصوره بالامير ممكن تعمل اي رسمه تحبها و لازم تلزق كويس جدا لانه ممكن يفك من السخونيه ممكن تلزق بالامير او الارنديد الشفاف
بعد تركيب السخان و نسيب ينشف كويس هنقوم بلزق الوش في الفانوس تاني عن طريق السيلكون و بعدها نربط الزجاج بالكشاف عن طريق السلوتيب و نسيبه ينشف كويس لان السيلكون اقل حاجه عاوز 6 ساعات علشان ينشف و الافضل نسيبه يوم كامل
بعد لما اتاكدنا انه نشف كويس و السيلكون مسك جامد هنرجع نركب الكشاف في مكانه تاني مع الملاحظه لو الكشاف كان متركب بالمسامير تمام رجعه زي مكان و لو كان راكب بسلك رباط الافضل تركبه باحزم بلاستك افضل و اقوي
و بكده نكون انتهينا من التركيب و متبقي التوصيل
خطواط توصيل الكهرباء
بعد تركيب الكشاف في مكانه بفضل الله هنقوم بتركيب اللمبات الجديده و ان شاء الله الدرس القادم هنشرح ازاي نعمل تقويه لسلك الكهرباء و تركيب كتاوت جديد علشان نظبط شده الاضاءه
هنقوم بتوصيل اطراف السخان مع النور الصغير كالاتي
الطرف الاحمر مع سلك النور الصغير
الطرف الابيض مع جسم العربيه او الارضي
شكرا و تقدير
اخيرا اتمني من الله ان اكون وفقت في
الشرح و هذا الموضوع هو عمل شخصي و اكيد به اخطاء فارجوا من الجميع المعذره
في اي اخطا و لو اصبت فهوا من الله و ان اخطاء فمني و من الشيطان
الموضوع مفتوح للنقاش لاضافه اي شي او تعديل الموضوع
تحياتي للجميع و لكم مني كل حب و تقدير
اخوكم / وليد ابو يوسف و عمر و نور